Сот-сараптамалық дайындық бойынша магистранттардың тәжірибелік көшпелі сабағы

Заң ғылымдарының кандидаты, қылмыстық-құқықтық пәндер кафедрасының оқытушысы Енсебаева А.Р. Қазақстан Республикасы Ішкі істер министрлігі Астана қаласының Полиция департаментімен ынтымақтастық туралы меморандум аясында «7М04209 – Сот сараптамасы» білім беру бағдарламасының магистранттары үшін Оқу криминалистикалық полигонында көшпелі сабақ өткізді.

Тәжірибелік сабақ барысында білім алушылар әртүрлі іздер мен құрал-саймандардан қалған зақымдарды анықтау, бекіту және зерттеу дағдыларын пысықтады, киімдегі, құлыптардағы, түйіндер мен пломбалардағы механикалық зақымдарды талдады, сондай-ақ механикалық әсер нәтижесінде пайда болған фрагменттерді, ойықтарды және өзге де іздерді зерттеді. Жол-көлік оқиғасының механизмін және мән-жайларын қалпына келтіру мақсатында көлік құралдарының шина іздерін зерттеуге ерекше назар аударылды.

Сонымен қатар, магистранттар оқ ізі мен атыс іздерінің қалыптасу ерекшеліктерін, олардың сәйкестендіру маңызын, сараптамалық зерттеуге жарамдылығын, сондай-ақ олардың пайда болу жағдайлары мен механизмін қарастырды.

Сабақ барысында сот-сараптамалық қызметтің әдіснамалық негіздері, сарапшылар шешетін типтік міндеттер, сараптамаға материалдарды дайындау және сұрақтарды дұрыс тұжырымдау талаптары, сондай-ақ сот сарапшысы мен криминалист-маманның қорытындысының дәлелдеу процесіндегі рөлі талқыланды.

Мамандандырылған құқық қорғау органдары базасында өткізілген сабақ магистранттардың тәжірибелік дағдыларын нығайтуға және сот сараптамасы саласындағы кәсіби даярлық сапасын арттыруға ықпал етеді.